బెంగాల్‌లో బీజేపీకి ఇదే బెస్ట్ ఛాన్స్: మాట్రిజ్ డైరెక్టర్ విశ్లేషణ

పశ్చిమ బెంగాల్‌లో బీజేపీకి ఇది అత్యుత్తమ అవకాశమని, అసోంలో ఎన్నికలు ఏకపక్షంగా మారాయని, తమిళనాడులో డీఎంకే తన ఆధిక్యాన్ని కొనసాగిస్తోందని మాట్రిజ్ న్యూస్ కమ్యూనికేషన్స్ డైరెక్టర్ మనోజ్ కుమార్ సింగ్ విశ్లేషించారు. కేవలం ఓటింగ్ శాతాన్ని బట్టి ఎన్నికల ఫలితాలను కచ్చితంగా అంచనా వేయలేమని ఆయన స్పష్టం చేశారు. నాలుగు రాష్ట్రాలు, ఒక కేంద్ర పాలిత ప్రాంతం ఎన్నికల ఫలితాలు మే 4న వెల్లడి కానున్న నేపథ్యంలో, ఐఏఎన్ఎస్‌తో మాట్లాడుతూ ఆయన ఈ ఆసక్తికర వ్యాఖ్యలు చేశారు.

పశ్చిమ బెంగాల్‌లో బీజేపీకి మంచి ఫలితాలు రావొచ్చని ఆయన విశ్వాసం వ్యక్తం చేశారు. "బెంగాల్‌లో బీజేపీకి ఇంతకంటే మంచి అవకాశం రాదు" అని ఆయన అన్నారు. వలస ఓటర్లు తమ పేర్లు ఓటర్ల జాబితా నుంచి తొలగిస్తారనే భయంతో పెద్ద సంఖ్యలో ఓటు వేయడానికి తిరిగి వచ్చారని, ఇది కూడా ఫలితాలపై ప్రభావం చూపించే అవకాశం ఉందని వివరించారు.

అసోం ఎన్నికల గురించి మనోజ్ సింగ్ వివరిస్తూ.. "ఓట్ల శాతం, గెలిచే సీట్ల సంఖ్య అనేవి రెండు వేర్వేరు అంశాలు. ఓట్ల శాతంలో చిన్న మార్పు కూడా ఫలితాలను గణనీయంగా మార్చేస్తుంది" అని అన్నారు. ముఖ్యమంత్రి హిమంత బిశ్వ శర్మ భార్య పాస్‌పోర్ట్ విషయంలో కాంగ్రెస్ చేసిన ఆరోపణలు బెడిసికొట్టాయని, ఆ తర్వాత కాంగ్రెస్ నేత పవన్ ఖేరా అసోం విడిచి వెళ్లడం ఆ పార్టీ శ్రేణుల్లో నాయకత్వ బలహీనత అనే భావన కలిగించిందని తెలిపారు. డీలిమిటేషన్ తర్వాత రాష్ట్రంలో హిందూ-ముస్లిం రాజకీయ సమీకరణాలు కూడా గణనీయంగా మారాయని ఆయన అభిప్రాయపడ్డారు.

తమిళనాడులో ముఖ్యమంత్రి ఎం.కె. స్టాలిన్ నాయకత్వంలో డీఎంకే పటిష్ఠంగా ఉందని మనోజ్ సింగ్ పేర్కొన్నారు. నటుడు విజయ్ కొత్తగా స్థాపించిన తమిళగ వెట్రి కళగం (టీవీకే) పార్టీ.. డీఎంకే, అన్నాడీఎంకే ఓట్లను చీలుస్తుందని అంచనా వేశారు. డీఎంకేకు 122 నుంచి 132 సీట్లు వచ్చి స్పష్టమైన మెజారిటీ సాధిస్తుందని తాను అంచనా వేసినట్లు గుర్తుచేశారు.